كبرنا

كان عندى امتحان امبارح
وقعدت افكر ف ايام ما كنت صغيره وكانت ماما تحضر معايا الادوات اللى محتاجاها للامتحان والنوم بدرى والصحيان قبل المعاد بكتير ..
والقلق .
والحلويات والعصير اللى كنا بناخده معانا ..
وف اللجنه لما حد ياخد منك قلم زياده وتبقى مستنيه ف الاخر عشان تاخده منه تانى لانه قلمك .
 بس كل الحاجات دى اختفت
بمرور الوقت لما كبرنا ما عادش فيه عصير ولا القلق الكبير .. ولا الاحلام اللى بنبقى حاطينها ع النتيجه ولا العجله اللى مستنينها هديه نجاحنا .
ولا بقينا نستنى ناخد القلم بتاعنا من صاحبنا اللى ف اللجنه .
بقينا نصحى نشرب قهوتنا وننزل قبل الامتحان بوقت قليل وتمام ندخل اللجنه نحل ونمشى .
بطلنا نراجع.
الحاجه الوحيده اللى كنا شبه محتفظين بيها هى الاحتفال باخر يوم امتحان .
ودا بمرور الايام ما بقاش يحصل لانه عادى
مش احباط هو بيجى وقت بنكبر فيه نفسيا .
بنبقى عرفنا كتير .

بس اقولكم الاحلى اننا بقينا بنفرح بالحاجات التانيه الصغيره
زى فنجان قهوه الصبح حتى لو بقى عادى
القط بتاعك ولا كلبلك لما تصحى من النوم تلاقيه جرى عليك لانك واحشه
. او صحابك اللى بيزوروك ويفرقو ف حياتك وف اوقاتك لانهم حقيقين .
الاخبار الحلوه اللى بتسمعها عن ناس بتحبهم .
كل دا بيفرق
يمكن كبرنا اه .لكن الاكيد انه فيه حاجات تانيه بقت تفرحنا .

Comments

Post a Comment

Popular posts from this blog

الونس

Image
 (والروح محتاجه لورح ترد فيها الروح ) جمله دى اول مره قريتها حسيتها معناها الونس . اه الونس ؛ زمان ولحد فتره قرييه ما كنتش فاهمه يعنى ايه ونس . لكن فهمتها ..... بالفعل . الونس هو حد معاك بس بروحه . روحه تلمس روحك من غير ما تتكلم او تنطق بحرف . الونس مش محتاج وجوده الكلام والتصنع والمجاملات . الونس اصلا شاف روحك ودخل فيها لمسها وقرب من نارها قبل جنتها . الونس شاف ضلمتك وما خافش منها بالعكس ونسك ببواقى النور اللى عنده لحد ما تنوصل لنورك . الونس هو وجود مميز جميل ما يتشافش غير بالروح. يابخت اللى عنده ونس يونس عليه حياته ف نورها وضلمتها . ابقو ونس لبعضكم . ادخلو والمسو ارواح بعض .  كونو ونس بجد لبعض .
Read more

قوه بعد وجع

Image
كان فيه جمله ف فلم بحبه بتقول ( الالم يطالبنا بالاحساس به )  وقعدت افكر يعنى ايه يعنى ايه احس بالم .  الفرق ما بين حسيت غصب عنى انى موجوع وانى بسمح لنفسى احس فرق كبير اووى الالم لما  يحصل فينا ونتوجع بنهرب منه بمليون طريقه وطريقه اما السماح بوجود الالم هو انى اتوجع بجد واسيب الوجع يدخل جوايا ويملانى واحسه اوووى . اغوص فيه .. بس مش اغرق اغوص واعرف اعوم جواه .. وبعد ما ياخد وقته ووقت حزنى . اقف عليه زى راكبين الامواج لحد ما موجته كلها تهدى . الالم محتاج حنكه حنكه امته هغوص وامته هركب امواجه الاهم من كل دا انى مش هجرى واسيبه لانى وقت ما هقاوم هغرق فيه وهو جوايا هيكون حمل تقيل يغرقنى اكتر زى حته الحديد . الهم يارب امنحنا حكمه وقوه قوه من روحك منك عشان نقدر نقوم من بعد الالم ونقوم اقوى من الاول قوه وسنده منك تخلى الوجع بتاعنا عمره ما يموتنا الوجع بتاعنا يقوينا . What does not kill you ..... Makes you stronger .💪💪
Read more

الباب

Image
كل واحد فينا جواه أوض كتير ،  عقلنا بيكون مليان بيها بيرتب فيها افكارنا زكرياتنا مشاعرنا كل حاجه من اول ما نتواد . وفيه اوضه واحده بتكون زى اوضة الكراكيب ، بنخزن فيها كل حزن كل وجع كل خزلان كل موقف مؤلم كل مشاعر تخوف لحد ما بتتكركب اوى. كل مره نحس فيها شعور مؤلم ندخل نرمى فيها ونستخبى ، نزين الباب من برا ونغطيه عشان ما نقربش عليه ونعرف نعيش جوانا واحنا عاملين مش عارفين ومتجاهلينه و تمام جدا ، بنفتكر اننا طول ما متجاهلين وجوده هنحس كويس طول الوقت ، لحد ما تيجى لحظه حد يقرب من مشاعرنا اوى او يقول حاجه تدايقنا  يقوم فاتح الباب بتاع الاوضه دى بضلمتها بكراكيبها وترابها يعفر علينا عقلنا ويشوش مشاعرنا وتفكيرنا وما نشوفش  بسببه .   معروفه دايما ان التجاهل ما بيحلش المشكله بل بيزودها . وبردو مشاعرنا لما بنتجاهلها تزود علينا . قبل كدا حد قالى اننا لو ما اهتمناش بالمشاعر بتاعتنا واديناها فرصه انها تعبر وتطلع بتقعد علينا لحد ما بتفطسنا . زى طفل صغير لو فضلنا نتجاهل تصرفاته الصغيره بمرور الوقت هيبداء يصرخ ويزعق ويخبط ويكسر ، وهتبقى محتاج بعد كدا وقت طويل تعالج التجاهل بتاعك للطفل...
Read more