الماتش

  لما كنت بحضر ماتش مصر .. كنت بتفرج على المشجعين اللى بيحضرو معايا
لاحظت حاجه واحده ف عيونهم انهم مشتاقين اننا نكسب حتى لو مش هيستفيدو حاجه
الحكايه وما فيها الاحتياح اننا نحس اننا نقدر نعمل حاجه
الاحتياج اننا نفرح لحاجه حتى لو كانت صغيره زى ماتش ف كاس العالم .
محتاجين جون واحد حتى لو مش هنفوز .
الناس فاقده لطعم اننا ف كاس العالم اصلا .
ولما خسرنا شوفت راجاله عجوزه طالعه من الكافيه موطيه راسها ومحبطه .
اتوحعت ليهم
اتوحعت عشان هما بجد محتاجين اى فرحه اى حاجه تفرحهم حتى لو جون واحد ونخسر الماتش .
الغريب الشباب ف المقابل اخد الهزيمه بسهوله وسلاسه .او ما كانتش فارقه اوووى
مش عارفه اقول هما متفهمين انه كفايا ان الفريق لعب كويس وبس ولا هما متوقعين اصلا اننا نخسر لانهم خايفين يعشمو ف الكسبان وعشمهم يضيع
مش عارفه بسراحه
بس اللى عارفاه كويس
اننا بقينا مستنين اى خبر حلو اى حاجه حلوه اى جمله ممكن تخلينا نبتسم .
انا اوقات ببقى نفسى اسمع اخبار حلوه .
حاجه تخلينى ابتسم حتى لو لحد تانى المهم ان خبر حلو
خبر يقولى ان الدنيا لسه بخير .